Bagera Cizîrê didome: Gundekî din hat rizgarkirin 

DÊRAZOR – Pêngava Bagera Cizîrê ku bi hemû leza xwe dewam dike, şervanên QSD`ê gundekî din ji çeteyên DAIŞ`ê rizgar kirin û erebeyeke çeteyan hate rûxandin.

Di çarçoveya Pêngava Bagara Cizîrê de ya rizgarkirina bejahiya Dêrazorê ji çeteyên DAIŞ`ê, şervanên QSD`ê li baskê Mergedê 1 Km ber bi gundê Kebra yê bakur-rojavayê bajaroka Mergedê ve, bi pêşve çûn.

Li baskê Siwerê jî , şervanan gundê Qawiş Limlihê yê  dikeve bakurê bajaroka Siwerê ji çeteyan rizgar kirin. Di encama şerê ku li gund rû dabû, 2 çeteyên  DAIŞ`ê hatin kuştin û cenazeyek  û tevî rextê çeteyekî ketin destê şervanên QSD`ê.

Li baskê Cezrat, çeteyên  DAIŞ`ê xwestin bi erebeyeke teqemeniyê êrîşe noqteyên QSD`ê bikin. Lê beriya ku erebe bighêje armanca xwe ji aliyê şervanan ve hate rûxandin.

Di heman demê de, çeteyên DAIŞ`ê di saet 00:30`an de êrîşe kargeha Konîko ya petrolê kirin. Li ser bersivdayîna şervanên QSD`ê, şerekî dijwar rû da. Di encamê de êrîşa çeteyan hate şikandin û du çeteyên êrîşkar hatin kuştin. Li vir cenazeyekî çeteyan kete destê şervanan.

Ji aliyekî din, şer li gundê El-Sawa ku 24 Km li bakur-rojavayê Dêrazorê dikeve ku duh ketibû çemperê, didome.