BEŞÊ RAGIHANDINA BUROYA YPJ Ê -MINBIC – Bi sedan şêniyên Minbic 4 cangoriyên xwe yên di Hemleya Rizgarkirina Reqqayê de şehîd bûn, spartin axê.

Şêniyên bajarê Minbicê xwedî li her 4 cangoriyên xwe derketin û li pêşiya nexweşxaneya Firat a bajarê Minbicê kombûn. Piştî ku girseya gel cenazeya 4 cangoriyên Meclîsa Leşkerî ya Minbicê Hadî Hac Mihemed, Hesen Ibrahîm, Ednan Hac Mihemed û Fehed Hac Mihemed ji nexweşxaneyê wergirtin berê xwe dan goristana Cangoriyên Minbicê.

Dirûşmeya `Bi can bi xwîn em bi te re ne ey şehîd` ji aliyê girseyê ve hat berzkirin û piştî karwanê oxirkirina her 4 cangoriyan gihîşte goristanê merasîmê destpê kir.

Şervanên Erka Xweparastine di despêka merasîmê de torena leşkerî lidar xistin. Hevserokê Saziya Malbatên Şehîdan a Minbicê Ibrahîm Xilîf di despêka gotinên xwe de Serokê dewleta Tirk Receb Tayîb Erdoxan bi dijminê yekîtiya gelan pênase kir û got:ʺTeror bi destê Erdoxan derbasî Sûriyê û herêmê bûyeʺ.

Xilêf di berdewamiya gotinên xwe de ji bo her 4 cangoriyan jî got ku ew her 4 şehîd pismamên hevin û ji bo parastina xak û rûmeta xwe canê xwe feda kirin.

Her wiha Hevseroka Desteya Parastine ya bajarê Minbicê Nofe Silêman di merasîmê de axivî û wiha got:ʺ Em ji hemû dayîkên ku zarokên wan ji bo xak û rûmeta xwe şehîd bûne sersaxî dixwazinʺ.

Derbare êrîşa dewleta Tirk a dagirker li ser Minbicê Nofe Silêman wiha got:ʺ Her ku şervanên QSD`ê li hemberî çeteyên DAIŞ`ê biserdikevin, dewleta Tirk har dibe û êrîşî gundewarên Minbicê dike. Ev êrîşên dewleta Tirk têkçûn û şervanên Meclîsa Leşkerî ya Minbicê bi lehengî li hemberî vê êrîşê li ber xwe danʺ.

Piştî axavtin bi dawî bûn endamê Saziya Malbatên Şehîdan Mihemed Omer nasnameya her 4 şehîdan xwend, radestî malbata wan kir û piştre jî girseya gel cenazeya şervanan spartin axê.

Şervanên Meclîsa Leşkerî ya Minbicê Hadî Hac Mihemed, Hesen Ibrahîm, Ednan Hac Mihemed û Fehed Hac Mihemed 10`ê hezîranê di Hemleya Rizgarkirina Reqqayê li gundê Qabîe yê girêdayî Reqqayê şehîd bûn.