YPJ Public Office
Serokomarê Tirk Recep Teyyip Erdogan gefan dixwe ku dê artêşa wî a dagirker êrîşî kantona Efrînê bike û roj bi roj gund û herêmên welatiyên sivîl dide ber topan. Şervanên Yekîneyên Parastina Gel û Yekîneyên Parastina Jin bi tundî bersivê didin van êrîşan.
Şervanên ku li eniyên şer ên pêşîn cihê xwe digrin zelal kirin û gotin ku dê bersiveke tund bidin êrîşên artêşa dagirker û aramiya kantonê biparêzin.
Yek ji şervanan Diyar Efrîn e. Vî şervanî destnîşan kir ku Erdogan dixwze bi dagirkirina Bakurê Sûriyê Împeratoriya Osmaniyan vegerîne û projeya Federaliya Demokratîk vala derbixe. Diyar got, em rê nadin ku Erdogan xaka Efrînê bibîne û hemû pîlanên wî vala derbixin.
Ji şervanan Şiyar Denîz jî da xuyakirin ku Tirkiye dixwaze bi êrîşên xwe di nava welatiyên sivîl de tirsê belav bike û ev tişt anî ziman “Di rastiyê de ew nikare li hemberî şervanên ku gelek serkeftin li hemberî çeteyan pêk anîne, şer bike. Eger dewleta Tirk îsrar bike ku derbasî xaka kantonê bibe bila baş bizanibe ku wê li ser xeta sînor dawiya wê were. Em bi yek ramanî ve girêdayî ne. An serkeftin an jî şehadet.”
Şervana YPJ’ê Tolîn Demhat jî diyar kir ku Artêşa Tirk hertim nuqteyên me bi çekên giran topbaran dike û ev tişt got “Ew texmîn dikin ku wê bi wan çekên xwe berxwedana me bişkînin, lê şervanan berxwedaniyeke mezin nîşan da û xwedî vîn û baweriyeke mezin in.”
Şervaneke din a YPJ’ê Arîn Berfîn jî bal kişand ku ew wekî şervanên YPJ’ê dê li hemberî Artêşa Tirk a dagirker ku dijberiya azadiya jinê dike, bisekinin û got “Bila hemû bizanibin ku jina azad a Bakurê Sûriyeyê dê tevahî jinan rizgar bike.”
