Odeya Çalakiyan a Pêngava Cizîra bîlançoya 8 rojan eşkere kir

DÊRAZOR – Odeya Çalakiyan a Pêngava Cizîra diyar kir ku hêzên wan ji destpêka pêngavê heta niha 14 mezra û gund û du bajarokên mezin ji çeteyên DAIŞ`ê, rizgar kirin. Odeyê anî ziman ku hêzên wan 4 hezar sivîl ji herêmên şer rizgar, kirine.

Pêngava Bagera Cizîrê ku 9`ê mehê dest pê kir, di roja 8`an de dewam dike. Odeya Çalakiyan a Pêngava Bagera Cizîrê bîlançoya 8 rojan bi daxuyaniyeke nivîskî, eşkere kir.

Daxuyanî wiha ye:

“Pêngava Bagera Cizîrê li dijî çeteyên DAIŞ`ê di 09.09.2017`an de dest pê kir û ta dîroka  îro berdewam dike.

Di 8 rojên pêngavê de, hêzên me 63 Km bi pêşve çûn û 14 mezra û gund û du bajarokên mezin, rizgar kirin. Her wiha kargeha şekir, mehleca pembo û stasyona ceyranê, hatin rizgarkirin. Di 8`ê rojan de, hêzên me bi çeteyên DAIŞ`ê 15 caran ketin şerê rû bi rû.

Hêzên me di şerê 8`ê rojan de dest danîn ser gelek pêtêl, çek û erebeyeke Tiwêta.

Her wiha hêzên me 5 maşîneyên bombebarkirî yên çeteyan beriya ku bighêjin  armancên xwe ji dûr ve teqandin. Çeteyan jî sê maşîneyên bombebarkirî beriya ku bighêjin armancên xwe, xwe teqandin. Ji aliyekî din çeteyan 4 êrîşe xwekujî pêk anî, lê neghîştin armancên xwe.

Di heman demê de, gelek çete di şerê 8 rojan de hatin kuştin û gelek cenazeyên wan ketin destê hêzên me.  Hêzên me dikaribûn 4 hezar sivîl ji herêmên şer rizgar bikirina û ew bighandina cihên bi ewle.

8 şervanên me di encama şerên 8 rojan de, gihîştin asta şehadetê.”