YPJ Public Office
TOLÎN HESEN-RÊZAN CEBEL
ŞEHBA – Fermandarekî ku beriya 3 rojan ji nava çeteyên Tirkiyê veqetiya da zanîn ku dagirkeriya Tirkiye li herêma Babê baregehên leşkerî yên stratejîk ava dike û hewl dide bingeha artêşeke damezrîne.
Parçebûn di nava komên çete yên girêdayî Tirkiyeyê de didome û taybet piştî diyarbûna mebestên Tirkiyeyê yên dagirkirina Sûriyê, herî dawî jî fermandarekî Tugaya El-Muitesim reviya û xwe radestî Artêşa Şoreşgeran ên li herêma Şebha kir.
Fermandarê bi navê Ewîd Ebû Seqir di hevdîtineke bi ANHA`yê re sedemên tevlîbûna xwe ji Tugaya El-Muitesim, qutbûna ji refên wan rastiya armancên Tirkiyeyê û xwespartina QSD`ê vegot. Li gor Ewîd Ebû Seqir sedema beşdarbûna wî, şerê li hember DAIŞ`ê bû. Lê paşê rastiya hedefên Tirkiyeyê eşker bûn.
Mebesta wan diyar bû
Fermandarê ku ev 3 roj in qut bûye, da zanîn ku piştî desteserkirina bajarê Babê, armanca dagirkeriye Tirk zelaltir bû û wiha pê de çû: “Tirkiye dixwaze bi riya me, axa me dagir bike. Me fereman, cebilxane û lojistîk yekser ji wan digirt. Tirkiye dixwaze serdema osmanî vegerîne û armanc ne şerê li hember DAIŞ`ê ye, ji xwe di navbera çeteyan û Tirkiye de hevdîtin çêdibûn û gelek gund hatin radestkirin û mînaka berbiçav jî ketina bajarê Cerablusê .”
Ebû Seqir da zanîn ku Tirkiye hewl da parçebûnê di navbera kurd û ereban de çêbike û ji bo vê yekê jî gelek dezgehên çapemeniyê bikar anîn.
Şerê li hember QSD`ê
Fermandarê berê yê Tugaya El-Muitesim destnîşan kir ku Tirkiye bi hinceta QSD`ê çete ye û Sûriye dagir dike, ew li hember pêşketinên QSD`ê yên li herêma Şehba sor dikirin. Lê di dawî de çeteyên rasteqîn xuya bûn.
Navendên perwerdekirinê û avakirina zemînê artêşeke çeteyan
Li gor fermandarê navbihurî, Tirkiye ji fermandarên Artêşa Azad daxwaz kir ku leşkerên xwe li herêma Edene û hin cihên din perwerde bikin. Li rex wê Tirkiye baregehên leşkerî li herêma Babê û Ezazê ava kir, leşkerên xwe li wir belav kir û zemîn damezirandina artêşeke çeteyan amade dike.
Ebû Seqir da zanîn ku gelek fermandarên li wir rastiya pîlanên Tirkiye nizanin û lewma hîna di bin sîwana wê de dixebitin.
Ji avakirina herêma ewle veguherî herêma leşkerî
Derbarê veguhestina çek û cebilxanê ji herêmê re, Ebû Seqir ev agahî parve kirin” qaşo mebest avakirina herêmek ewle ye ku çek û cebilxane lê neyên bikaranîn. Lê herêm veguherî qadeke leşkerî. Dem bi dem cebilxan derbasî herêmê tê kirin û ev yek ji bo şerê li hember artêşa şoreşgeran û hêzên QSD`ê ye.”
“Min feremana wan red kir, rapeyî min ketin “
Ewîd Ebû Seqir destnîşan kir ku dagirkeriya Tirkiye li komên girêdayî Artêşa Azad ên di bin serweriya wê de ferz kir ku di civînên Asîtana de amade bibin û wiha got “em li dijî hevdîtinên ku aliyên derve derbarê rewşa Sûriyeyê de pêk tînin, fermandarekî Artêş Tirkiye ji min xwest ku ez civînên Asîtana hazir bikim û çend caran min red kir, lewma rapeyî min ketin û bi saxî an mirî ez xwestim.”
Sedema qutbûnê
Fermandarê ku ev 3`ê rojin qut bûye, sedema vê yekê wiha rave kir yeke ” sedemek qutbûna min, ku komên li herêmên rizgarkirî ew şoreşgerên rasteqîn in û zarokên Sûriyeyê ne, em çiqasî di nava xwe ji hev cuda bin, lê Sûriye bi me rizgarkirin. Eger em di bin sîwana dagirkeriya Tirkiyeyê de bin, armanca me a xistina rêjîmê qet pêk nayê.”
Ebû Seqir gotinên xwe bi vê bangê bi dawî kir “beriya sivîlan ez bang li leşkeran dikim ku di dagirkirina Sûriyeyê de desteke nedin Tirkiye û bila armancên rasteqîn ên Tirkiyê jî bibînin.”
Koma bi navê Tugaya El-Muitesim ku Ewîd Ebû Seqir fermandariya wê bû û beriya sê rojan xwe radestî QSD`ê kir, li bajarokê El-Marii ya herêma Şehba belav dibe û hin navendên xwe li wir hene, her wiha bi destpêkirina operesyona dagirkirina Tirkiyeyê di 24`ê tebaxa 2016`an de, tevlîbûna xwe jê re ragihand.
ÇAVKANÎ:HAWAR
