YPJ Public Office
EFRÎN – Hejmara şehîdên komkujiya gundê Cilbirê zêde bû. Her wiha di encama topbarana artêşa Tirk a dagirker li ser gundên Efrînê zarokekî din şehîd bû.
Duh balafirên şer ên artêşa Tirk a dagirker komkujiyek li gundê Cilbirê yê Efrînê pêk anî. Di encamê de 7 sivîl şehîd bûn û 12 sivîlên din jî birîndar bûn. Her wiha hinek sivîl di bin enqazan de man. Lê ji ber gera balafirên artêşa Tirk a dagirker li ser gund, ekîpên rewşên awarte nikaribûn cihê komkujiyê baş lêkolîn bikirina.
Çavkaniyan dane zanîn ku niha cenazeyên du zarokên ku di komkujiya gundê Cilberê şehîd bibûn û cenazeyên wan di bin enqazan de bûn, gihîşt nexweşxaneyên Efrînê. Her du zarok nasnameyên wan ev in: Samî Mihemed Hisên 16 salî, Ehmed Qidor Rehmano.
Bi vê yekê re, hejmara şehîdên komkujiya gundê Cilberê gihît 9 şehîdan.
Di heman demê de, di encama topbarana artêşa Tirk a dagirker li ser gundê Eltana yê girêdayî herêma Raco de, zarokê bi navê Mihemed Xelîl Bekir ê 10 salî şehîd bû.
